Ndërron jetë në Itali 15 vjeçarja nga Gajushi i Lezhës

Është rënduar bilanci i viktimave në familjen Gjoka, në Velipojë, pas shpërthimit të gazit në hotelin në pronësi të tyre, mëngjesin e 4 korrikut.

Gazetari i BalkanWeb Elidon Ndreka raporton se ka ndërruar jetë edhe vajza 15-vjeçare e familjes, e cila pësoi djegie të shumta në trup, bashkë me nënën, vëllanë e mitur dhe dy motrat, njëra prej të cilave humbi jetën pak ditë më parë.

15-vjeçarja Klarisa Gjoka ishte dërguar për trajtim mjekësor më të specializuar në Itali, bashkë me tre familjarët e tjerë, por nuk ka mundur dot t’iu mbijetojë plagëve të rënda.

Ajo ka ndërruar jetë pak ditë pas vdekjes së motrës së saj, 19-vjeçares Daniela Gjoka, po në Itali.

Kjo është ndër ngjarjet më të rënda të dekadës së fundit në një familje në Lezhë. Dhimbja e madhe dhe përmasat e tragjikes e kanë tronditur çdokënd që e njeh familjen Gjoka, por jo vetëm.

Katër anëtarët e familjes Gjoka, nga Gajushi i Lezhës, kishin shkuar për të pastruar hotelin e tyre në Velipojë, për ta bërë gati për pushuesit, por mëngjesi i 4 korrikut ishte tronditës për ta.

E ëma ishte ngritur të bëjë kafenë, por sapo ka ndezur bombolën e gazit, ka shpërthyer flaka, për shkak të rrjedhjes së gazit të shtatë bombolave, duke shkrumbuar hotelin dhe duke i plagosur ato rëndë, ku tashmë dy vajzat kanë humbur tragjikisht jetën.